ޅައިމަގު މިސްކިތުން ސިހުރު ހަދާފައި ހުއްޓާ ފެނިގެން ނައްތާލާފައިވާ ކަމުގެ ވާހަކަތަކެއް ރަށުތެރޭގައި ދެކެވެން ފަށައިފިއެވެ. މަސްޖިދުލް އަޛްހަރު ނުވަތަ ކުޑަ މިސްކިތުގައި ސިހުރު ހަދާފައި ހުއްޓާ ފެނިފައިވަނީ މިސްކިތުގެ އިމާމުވެ ނަމާދު ކުރައްވަމުން ގެންދަވާ ފަރާތަށެވެ.
މައުލޫމާތު ލިބިފައިވާ ގޮތުގައި ފެނިފަވަނީ އިންސާނުންގެ ބޮލުގެ އިސްތަށި ސިހުރު ހަދަންބޭނުން ކުރާޒާތުގެ އެއްޗެހީގައި އޮޅައިގެން ހަދާފައިވާ ސިހުރެކެވެ. އެ ތަކެތި ފެނުމާއި ގުޅިގެން އެކަން ކައުންސިލަށް ރިޕޯޓްކޮށްފައިވެއެވެ. އަދި މައުލޫމާތު ދޮގުކަމުގައި ނުވާނަމަ، ރަށު ކައުންސިލުން މިހާރު ވަނީ ދީނީ ކަންކަމާގުޅޭ ވުޒާރާގެ އިރުޝާދުގެ ދަށުން ސިހުރު ބާތިލުކޮށް، ތަކެތި ވަނީ ނައްތާލާފައެވެ.
މީގެ ކުރިންވެސް ރަށުގައި ސިހުރު ހެދުމާއި ނުވަތަ ސިހުރު ޖެހިގެން އެކަމުގެ ވޭން ތަހައްމަލް ކުރަންޖެހުމުގެ ހާދިސާތައް ގިނަ އަދަދަކަށް ހިނގާފައިވެއެވެ. ނަމަވެސް މިސްކިތްތަކަށް ސިހުރު ހަދާފައިވާ ކަމުގެ އަޑު ފެތުރުން މިއީ ވަރަށް މަދުން ރަށުގައި ހިނގާ ކަމެކެވެ. އެހެން ނަމަވެސް ސްކޫލުގައި ކިޔަވާ ދަރިވަރުންތަކެއް އަނބުރައިގަތުން ފަދަ ކަންތައްތަކަކާއި ސިހުރާއި ގުޅުވައި ތުހުމަތުތަކެއް މި ފަހުންވެސް ރަށުގައި ކުރެވިފައިވެއެވެ.
ސިހުރަކީ އޭގެ އަސަރުކުރުމުގެ ސަބަބުން އެއްބައި ފަހަރު އުމުރު ދުވަހު އޭގެ ވޭން ތަހައްމަލު ކުރަންޖެހޭ ނުރައްކާތެރި ކަމެކެވެ.